Fréttir

Skráningar og dagskrá sumarfjörs 2017

11.04.2017

Nú er komin dagskrá fyrir sumarfjörið 2017 og búið að opna fyrir skráningar. Sjáðu dagskránna með því að smella hérna.

Lesa meira

Páskafrí á skrifstofunni

10.04.2017

Skrifstofan verður lokuð frá 10.apríl til 17.apríl. Við opnum aftur á þriðjudaginn 18.apríl. 

Bestu kveðjur og gleðilega páska.

Lesa meira

Umsóknir um starfsstyrki

06.04.2017

UMSB auglýsir eftir umsóknum um starfsstyrki Borgarbyggðar, og skulu umsóknir hafa borist á skrifstofu UMSB eða í netfangið umsb@umsb.is fyrir 1.maí 2017.

Um starfsstyrki geta sótt félög og deildir þeirra sem sinna íþrótta- eða félagsstarfi innan UMSB eða hafa með höndum aðra sambærilega starfsemi. Megináherslan er á að styrkja starf með börnum og unglingum yngri en 16 ára og að starfsemin sé á forsendum uppeldislegra gilda og forvarna í víðum skilningi. Starfsemin þarf að fara fram undir leiðsögn hæfra starfsmanna, þannig að fagmennska sé viðhöfð við kennslu og þjálfun barna og unglinga. Skilyrði er að félagið hafi starfað í a.m.k. 2 ár og staðið skil á lögformlegum skyldum sínum t.d. haldið aðalfund, lagt fram ársskýrslu, ársreikninga o.s.frv. 

Nánari upplýsingar um starfsstyrki Borgarbyggðar og upplýsingar um fylgiskjöl og gögn má finna hér: http://www.umsb.is/skrar/file/samstarfssamningar-umsb-og-borgarbyggdar/vidaukiastarfsstyrkirloka.pdf 

Einnig er velkomið að hafa samband við Pálma í síma 869-7092, fyrir frekari upplýsingar.

Lesa meira

Sambandsþing UMSB

15.03.2017

Laugardaginn 11.mars sl. var 95.sambandsþing UMSB, og var það haldið í Hjálmakletti í Borgarnesi að þessu sinni. Dagskrá þingsins var hefðbundin samkvæmt lögum sambandsins og fengum við góða gesti í tilefni þingsins, en Gunnlaugur Júlíusson sveitarstjóri Borgarbyggðar færði kveðjur frá ÍSÍ en hann situr í stjórn ÍSÍ og Guðmundur Sigurbergsson færði kveðju UMFÍ ásamt því að hann veitti Írisi Grönfeldt starfsmerki UMFÍ fyrir störf hennar í þágu ungmenna og íþróttastarfs í gegnum árin. Sólrún Halla sambandsstjóri UMSB færði Rósu Marinósdóttur viðurkenningu sambandsins, en hún vann flestar vinnustundir allra sjálfboðaliða í tenglsum við undirbúning og framkvæmd Unglingalandsmótsins sem haldið var í Borgarnesi um verslunarmannahelgina 2016. Það var mjög viðeigandi þegar heiðra átti Rósu fyrir sjálfboðaliðastörf að hún var fjarverandi við sjálfboðaliðastörf í þágu kvenfélags sem var að sjá um kaffiveitingar fyrir sjálfboðaliða í Björgunarsveitinni Ok svo dóttir hennar tók við viðurkenningunni fyrir hennar hönd, en auðvitað fór Sólrún Halla sambandsstjóri síðar um daginn og óskaði Rósu til hamingju og fékk mynd  

Íris Grönfeldt sem situr í stjórn afreksmannasjóðs UMSB tilkynnti um styrkveitingar úr sjóðnum fyrir afrek ársins 2016. Það voru 6 íþróttamenn sem hlutu styrk úr sjóðnum að þessu sinni en það eru; Bjarki Pétursson golfari, Birgitta Dröfn Björnsdóttir og Daði Freyr Guðjónsson dansarar, Bjarni Guðmann Jónsson og Sigurður Aron Þorsteinsson körfuboltamenn og Ingibjörg Rósa Jónsdóttir badmintonkona.

Þingstörf gengu vel og Guðmundur Sigurðsson og Kristján Gíslason þingforsetar stýrðu þinghaldinu af miklum myndarskap. Fram kom á þinginu að fjárhagslegur rekstur UMSB gekk vel á árinu 2016 og skilaði hagnaði, en það má að mestu leyti rekja til hækkunar á lottótekjum frá fyrra ári og afgangi frá framkvæmd Unglingalandsmótsins. Mikil samstaða var um þær tillögur sem afgreiddar voru á þinginu og fundarmenn almennt sáttir með gott þing. Í lok þingsins var kosið um laus embætti í stjórn og var Sólrún Halla kjörin sambandsstjóri til eins árs, Kristín Gunnarsdóttir var kjörin ritari til tveggja ára og er hún að koma aftur í stjórn UMSB eftir stutta fjarveru, Þórður Sigurðsson var kjörinn vararitari til tveggja ára, Anna Dís Þórarinsdóttir var kjörin meðstjórnandi til tveggja ára og Þórhildur María Kristinsdóttir var kjörin varameðstjórnandi til tveggja ára. Skoðunarmenn reikninga voru kjörnir til eins árs og það voru þeir Eiríkur Ólafsson og Guðbrandur Brynjúlfsson og Einar Ole Pedersen til vara. Nokkrar myndir frá þinginu eru í myndaalbúminu.

 

Lesa meira

Umsóknir í afreksmannasjóð UMSB

09.02.2017

Við minnum á að nú er tekið á móti umsóknum í afreksmannasjóð UMSB, en umsóknir í sjóðinn þurfa að berast fyrir 1.mars nk. og má skila þeim með tölvupósti á umsb@umsb.is eða á Skallagrímsgötu 7a, 310 Borgarnesi.

Reglugerð sjóðsins má sjá hér: http://www.umsb.is/is/page/reglugerdir 

Allar nánari upplýsingar veitir Pálmi í síma 869-7092. 

Lesa meira

Íþróttamaður Borgarfjarðar 2016 er Sigrún Sjöfn Ámundadóttir

14.01.2017

Sigrún Sjöfn Ámundadóttir körfuknattleikskona í Skallagrím er íþróttamaður ársins 2016. Sigrún er vel að þessum titli komin, en hún hefur staðið sig frábærlega með landsliði íslands í körfuknattleik ásamt því að hún er lykilleikmaður í úrvalsdeildarliði Skallagríms.

Lesa meira

Frístundastyrkur

03.01.2017

Frístundastyrkur fyrir börn og ungmenni í Borgarbyggð

Sveitarstjórn Borgarbyggðar samþykkti á fundi sínum 8. desember sl. reglur um frístundastyrk fyrir börn og ungmenni  í Borgarbyggð. Með tilkomu styrksins eru öll börn og ungmenni á aldrinum 6-18 ára styrkt með framlagi að upphæð kr. 20.000 á ári eða kr. 10.000 á önn . Markmið framlagsins er að hvetja börn og ungmenni til að taka þátt í frístundastarfi í Borgarbyggð.

Ástæða þess að sveitarfélög um land allt hafa tekið upp slíka styrki eru niðurstöður langtíma rannsókna á líðan íslenskra barna og ungmenna sem sýna að þátttaka í slíku starfi, sem nær yfir að minnsta kosti 10 vikur, hefur marktæk áhrif á bætta líðan. Íþróttastarf og skátastarf vegur þar langþyngst á metum.

Hægt er að nýta frístundastyrk í:

  • skipulagt frístundastarf í Borgarbyggð sem stundað er undir leiðsögn þjálfara eða leiðbeinanda samfellt í amk. 10 vikur. Þetta á t.d. við um allt íþróttastarf sem stundað er á vegum viðurkenndra íþróttafélaga, dans í dansskólum, skátastarf og annað reglubundið frístundastarf,
  • íþrótta- og tómstundanámskeið barna í 1. og 2. bekk sem skráð eru í íþrótta- og tómstunaskólann,
  • árskort/sundkort fyrir ungmenni eldri en 16 ára,
  • nám í tónlistarskóla sem er samfellt í 10 vikur.

Úthlutun frístundastyrksins hefst í byrjun janúar 2017 og fer hún fram á íbúagátt Borgarbyggðar og í gegnum skráningarkerfið Nóra vegna starfs hjá félögum UMSB.  Bæði er hægt að nýta styrkinn beint hjá félögum innan Borgarbyggðar sem og í öðrum sveitarfélögum.  Þegar frístundastyrkurinn er nýttur í gegnum skráningarkerfi Nóra þarf að haka í kassann „Nota frístundastyrk Borgarbyggðar“ og þá lækkar upphæð æfingagjalda um þá upphæð sem nemur inneign frístundastyrks fyrir barnið.

Þeir sem nýta frístundastyrkinn til niðurgreiðslu á tónlistarnámi velja að nýta styrkinn í skráningarformi Tónlistarskólans.

Í öllum tilfellum byrjarðu á að skrá þig inn á íbúagátt Borgarbyggðar. Ef þú átt ekki lykilorð skráirðu kennitöluna þína í reitinn Nýskráning og færð lykilorð sent í heimabankann þinn.

Greitt er tvisvar á ári, kr. 10.000 eru greiddar í janúar fyrir vorönn og kr. 10.000 í ágúst fyrir haustönn.

Mikilvægt er að nýta styrkinn við skráningu í upphafi annar. Styrkurinn færist ekki milli ára.

Lesa meira

Jólafrí

26.12.2016

Skrifstofan okkar verður lokuð á milli jóla og nýárs og opnar aftur eftir jólafrí mánudaginn 2.janúar.

Lesa meira

Íþróttamaður Borgarfjarðar 2016

08.12.2016

Stjórn UMSB óskar eftir ábendingum frá almenningi um íþróttafólk sem þykir hafa náð góðum árangri eða skarað fram úr í sinni íþrótt á árinu 2016. Samkvæmt reglum um kjör íþróttamanns Borgarfjarðar þá er stjórn UMSB heimilt að tilnefna allt að þrjá einstaklinga eða pör að eigin frumkvæði eða eftir ábendingum frá almenningi. Þessar tilnefningar eru til viðbótar við þær sem koma frá aðildarfélögum og deildum UMSB. Ábendingarnar skulu berast í tölvupósti á netfangið umsb@umsb.is fyrir  2. janúar 2017. Kjörið fer fram strax í framhaldinu og er verðlaunaafhending áætluð 14. janúar 2017.

Allar nánari upplýsingar er hægt að fá í síma 869-7092. 

Lesa meira

Samæfing SamVest

15.11.2016

Samæfing á vegum SamVest  

 

Eins og fram hefur komið í fréttum á FB-síðu SamVest, þá stefnum við að samæfingu haustsins í Kaplakrika – föstudaginn 18. nóvember 2016 kl. 17.00 – 20.00.

 

Æfingin er fyrir 10 ára og eldri á starfssvæði SamVest.

Mætið með æfingaföt og innanhússíþróttaskó, gaddaskó þau sem eiga.


Þjálfarar FH sjá um þjálfunina, mögulega þjálfarar frá okkar félögum líka.  
Nesti á æfingunni í boði SamVest.

Eftir æfingu förum við saman og fáum okkur kvöldsnarl.

Æfingin er þátttakendum að kostnaðarlausu, en hver og einn borgar fyrir sig í kvöldmatinn.

 

Hér má skrá þátttöku á sérstakt eyðublað – smellið hér. Endilega skráið sem allra fyrst – mætum sem flest og gerum þetta að góðri æfingu!!

 

Athugið að laugardaginn 19. nóvember fara fram Silfurleikar ÍR – sjá upplýsingar hér.
Á Silfurleikunum er í boði fjölþraut fyrir 9 ára og yngri, fjórþraut (60 m, 600 m, langstökk og kúluvarp) fyrir 10-11 ára og svo 6-7 keppnisgreinar að eigin vali fyrir 12 ára og uppí 17 ára.
Hvert félag sér um skráningu sinna iðkenda, en hér er hlekkur á mótið í mótaforriti FRÍ. 

 

Með kveðju,
SamVest, framkvæmdaráð

 

 

Lesa meira

Sýnum karakter, ráðstefna og ný heimasíða

29.09.2016

Sterkari karakter nær lengra innan og utan vallar

„Árangur í íþróttum snýst ekki aðeins um líkamlega getu. Hann snýst líka um það að leikmenn þurfa að hafa gott hugarfar og vera góðir liðsmenn. Með markvissri þjálfun karaktera í börnum og ungmennum þá styrkjum við þau fyrir lífið, þátttöku í samfélaginu og aukum líka möguleika þeirra inni á íþróttavellinum,“ segir Viðar Halldórsson, lektor í félagsfræði við Háskóla Íslands.

Hann hefur um nokkurra ára skeið þróað leiðarvísi fyrir þjálfara til að hlúa að og efla andlega og félagslega þætti hjá börnum og ungmennum.

 

Hægt að styrkja leiðtogafærni barna

Viðar segir mikla áherslu hafa verið lagða í þjálfun á líkamlegri færni og tækni og jafnvel sé búið að festa það í námskrám íþróttafélaga hvað eigi að læra og á hvaða ári. Þjálfun í hugarfari og félagsfærni sé hins vegar mjög tilviljanakennd.

„Það er vel hægt að þjálfa og styrkja leiðtogafærni eins og stökkkraft. Ef við gerum það með markvissum hætti þá náum við meiri árangri. Með þessu er íþróttahreyfingin bæði að sinna uppeldisþáttum starfsins og afreksþáttum starfsins,“ segir Viðar.

 

Ráðstefnan Sýnum karakter

Viðar Halldórsson er ásamt Hafrúnu Kristjánsdóttur, íþróttasálfræðingi og lektor við Háskólann í Reykjavík, höfundur að verkefninu Sýnum karakter. Ráðstefna með sama heiti verður haldin í Háskólanum í Reykjavík laugardaginn 1. október næstkomandi. Ráðstefnan hefst klukkan 10:00 og stendur til klukkan 12:30.

Á ráðstefnunni munu íþróttafólk og þjálfarar halda erindi um ýmsar hliðar þjálfunar og ræða málin í pallborði. Ráðstefnugestir geta tekið þátt í umræðunum.

Ungmennafélag Íslands (UMFÍ) og Íþrótta- og Ólympíusamband Íslands (ÍSÍ) vinna saman að verkefninu Sýnum karakter.

 

Þátttakendur á ráðstefnunni eru:

Heimir Hallgrímsson, landsliðsþjálfari karlalandsliðs Íslands í knattspyrnu
Margrét Lára Viðarsdóttir, íþróttafræðingur, B.S. í sálfræði og landsliðskona í knattspyrnu
Vanda Sigurgeirsdóttir, lektor í tómstunda- og félagsmálafræðum við HÍ
Íris Mist Magnúsdóttir, íþróttafræðingur og landsliðsþjálfari í hópfimleikum
Dr. Hafrún Kristjánsdóttir, íþróttasálfræðingur og og lektor á íþróttasviði við HR
Dr. Viðar Halldórsson, lektor í félagsfræði við HÍ

Vefsíðan www.synumkarakter.is verður opnuð á ráðstefnunni en þar verða greinar og viðtöl við þjálfara og afreksíþróttafólk þar sem helsta umfjöllunarefni er efling andlegra og félagslegra þátta í gegnum þjálfun. Þjálfarar og íþróttafélög geta nýtt sér efnið á vefsíðunni.

 

Hlekkur á skráningarsíðu ráðstefnunnar Sýnum karakter: http://www.isi.is/default.aspx?pageid=1f624681-7b3b-11e6-940f-005056bc530c

Hér er Facebook-viðburðurinn: https://www.facebook.com/events/930560893754018/

Hvað: Sýnum karakter – Ráðstefna / samstarfsverkefni ÍSÍ og UMFÍ

Hvar: Háskólinn í Reykjavík

Hvenær: Laugardaginn 1. október á milli 10:00-12:30

 

 

Lesa meira

Takk fyrir okkur!

04.08.2016

Um verslunarmannahelgina fór fram Unglingalandsmót UMFÍ í Borgarnesi og voru það UMSB og aðildarfélög þess ásamt Borgarbyggð sem voru mótshaldarar. Talsverður undirbúningur er á bakvið viðburð af þessari stærðargráðu þar sem tæplega 1500 keppendur mæta til leiks og 10-15 þúsund gestir heimsækja Borgarbyggð á einni helgi. Frá byrjun árs 2016 hefur verið starfandi Unglingalandsmótsnefnd sem skipuð er fulltrúum úr stjórn UMSB, stjórn UMFÍ ásamt starfsmörnnum og íbúum Borgarbyggðar. Hlutverk nefndarinnar er að undirbúa og skipuleggja viðburðinn og sjá til þess að keppnisgreinar, afþreying og allur aðbúnaður sé eins og best verður á kosið. Einnig hafa starfsmenn áhaldahúss Borgarbyggðar og nemendur vinnuskólans unnið frábært starf í sumar við að koma bænum í „sparifötin“ og getum við öll verið stolt af bænum okkar sem heillaði gesti alla helgina.

Mótið hófst á fimmtudegi með keppni í golfi og körfubolta, þegar leið á helgina bættust fleiri greinar við en alls var keppt í 14 greinum frá fimmtudegi til sunnudags. Tókst mótahaldið mjög vel og voru margir að bæta árangur sinn verulega. Sett voru tvö íslandsmet í frjálsum, í hástökki stúlkna 13 ára og í boðhlaupi stúlkna 16-17 ára. Fjöldi landsmótsmeta voru sleginn og ungur kylfingur náði draumahögginu og fór holu í höggi á 14.braut á Hamarsvelli.

Fjölbreytt afþreying var fyrir alla aldurshópa frá fimmtudegi fram á sunnudagskvöld og má þar m.a. nefna kvöldvökur öll kvöldin þar sem fram komu nokkrir af vinsælustu tónlistarmönnum Íslands í dag, en þar má t.d. nefna; Friðrik Dór, Úlfur Úlfur, Dikta, Amabadama o.fl.. Hoppukastalar voru bæði á tjaldstæðinu og í Skallagrímsgarði, boðið var uppá kennslu í „street“ fótbolta, fótboltakeppni var fyrir yngstu gestina, kvikmyndasýningar, andlitsmálning o.fl.. En það var almennt mikil ánægja gesta með fjölbreytt úrval afþreyingar fyrir alla aldurshópa og fengum við mikið hrós fyrir.

Umgengni gesta var til fyrirmyndar og þó veðrið hafi verið gott frá fyrsta degi mótsins þá batnaði það með hverjum deginum sem leið og á sunnudeginum var komið glampandi sólskin, logn og bros á hverju andliti.

Mótið tókst einfaldlega frábærlega og er það ekki síst að þakka þeim fjölmörgu sjálfboðaliðum sem stóðu vaktina með sóma, íbúum Borgarbyggðar sem tóku á móti gestum með bros á vör og öllum þeim keppendum og gestum sem tóku þátt í mótinu og þeirri afþreyingu sem var í boði.

Takk fyrir hjálpina íbúar Borgarbyggðar og sjálfboðaliðar, og takk fyrir komuna góðir gestir og keppendur!

Sjáumst á næsta Unglingalandsmóti í Fljótsdalshéraði 2017!

 

F.h. Stjórnar UMSB

Pálmi Blængsson, framkvæmdastjóri.

Lesa meira

Mótaskrá og hagnýtar upplýsingar vegna Unglingalandsmóts

27.07.2016

Smelltu hér til að sjá tímasetningar, kort og fleiri hagnýtar upplýsingar varðandi Unglingalandsmótið 2016

Lesa meira

Vefsíðugerð & vefhönnun: Smartmedia 2012